Dhacdo la yaab leh, hase yeeshee in aan badneyn u soo laab-laabatay ayaa ka dhacdey degmada waaberi ee magaalada Muqdisho, iyadoo arrintanina ay tahay mid afka lagu wada hayo.

Haweeney lagu magacaabo Fartuun ayaa hal mar ay wada fureen sedex nin oo si qarsoodi ah ay u mehersatay, kadib markii is qab-qabsi kadib si kedis ah ay u ogaadeen in ay sedex nin wada guursatey.

Mid ka mid ah raga ay haweenkani guursatey oo qaraabo ay ahaayeen, si qarsoodi ahna ay isku qabeen ayaa ka dhiidhiyay, kadib markii uu dhowr habeen ugu tagay gurigooda iyada oo nin kula hasaaweysa, muran kadibna ay ku soo baxeen qoyskeeda oo uu u sheegay in uu qabo Fartuun, uuna u dulqadan karin, waxyaabaha socda, balse iyada ayaa arrintaasi gaashaanka ku dhufatay oo sheegtey in uusan qabin, hase yeeshee markii buuqa uu batey ayuu sheegay in uu sedex ku furey.

Arrintaasi waxaa ay anfariir ku ridey ninkii ay gudaha ay kula hasaaweysay oo isbna ka mid ahaa ragii ay sida qarsoodiga ahaa ku mehersatay, wuxuu isna sheegay in uu furey, tanina waxa ay noqotay arrin kale oo qoyska buuq gelisa, inkastoo Fartuun ay qiratay meherka wiilkan, ayna ku tilmaantey buuqii hore mid lagu sumcad dilayo, balse furiinka wuu dhacay.

Laakiin intii buuqa uu socdey waxaa yimid nin kale oo isna ahaa ninkii sedexaad oo qabey, kaasi oo buuqa guriga la yaabey, markii dadka goobta ku sugnaa uu weydiiyayna loo sheegay in Gabar Fartuun la yiraahdo oo guriga degen ay labo nin guursatey, taasi oo isna qaracan ku noqotay, isna goobta ayuu ku furey.